最近，TVB出咗几档新综艺，有主打灵异恐怖故事嘅《请勿关灯》，有以无线剧集《爱·回家》为基础设计嘅美食节目《马家开饭》，有无厘头搞笑短片合集嘅《最紧要好玩》，有主推怀旧经典音乐回顾嘅《流行经典50强》等。

呢两日，我一口气睇晒所有综艺，最后喺TVB看似形形色色、百花齐放嘅新综艺之中，我发现睇得落去嘅有且只有一部。

就系《流行经典50强》。

《流行经典50强》系由薛家燕、黎小田、曹永廉及汤宝如联合主持嘅怀旧音乐节目，精选香港乐坛50首经典流行金曲，邀请原唱人或实力歌手现场演绎经典。

首先，问下大家，何为经典金曲？

连续睇完前两集之后，我对经典金曲有咗新嘅定义。

经典金曲就系，一开始睇呢个名，我会觉得个节目应该几无聊，但系当我听完张德兰演唱《情义两心坚》之后……

我就即刻忽略节目制作有几粗糙、简陋，当场决定追落去。

之后登场嘅包括有李司棋演唱《啼笑因缘》、曹永廉演唱《难忘你》、汤宝如演唱《我为你狂》、黄翊演唱《最爱的你》、蔡立儿演唱嘅《绝恋》、孙耀威演唱《爱的故事（上集）》等

▲你咪话，曹永廉唱歌都好好听！

可能有好多歌你未必听过，但系首首旋律独特，感情动人，令你听出耳油，绕梁三日。

可能有好多歌手你唔知系边个，但系只要佢哋一出声，唱功同声线即刻就可以征服你嘅听觉。

（如果用表情包表示，就系咁↓）

所谓经典，就应该系历经时间洗礼之后，依然可以历久常新，闪闪生辉。

喺第二集登场嘅黄翊就系一个例子。

黄翊喺86年新秀歌唱比赛展露歌喉，后签约新艺宝出道，三年内推出6张唱片，攞过劲歌金曲金奖，曾经辉煌一时，被誉为“张国荣嘅接班人”。

后来黄翊因为坚持同黄宝欣嘅感情而同公司反面，被公司雪藏，因星途渺茫好快就退出乐坛，如今同屋企人一齐打理大排档，过安稳嘅平凡生活。

黄翊喺节目上演唱自己巅峰之作《最爱的你》，就算冇唱咁多年，歌喉唱功一如当年，并未有任何退步，反而多咗啲历经沧桑嘅韵味。（文章最后有视频！）

就算系90后嘅我，喺从未听过呢首歌嘅情况下，依然会被佢嘅演唱所感染，呢啲先系真正嘅实力派！

其实，喺七八十年代嘅香港乐坛，黄翊嘅唱歌水平唔算得上顶尖，嗰时随便搵一个歌手，都有黄翊咁嘅水平。

香港乐坛之所以曾经如此辉煌，就系因为佢对出道嘅歌手都有严格嘅要求，讲嘢稍微唔正、声线差啲，都冇任何出碟机会，更莫讲走音呢啲严重问题。

所以曾经嘅香港先会诞生咁多现场演唱同CD几乎毫无区别嘅实力唱将。

依家嘅演艺界，好似随便一个人只要识唱两句，经过包装就可以出道唱歌出唱片，快餐式嘅造星孕育出嚟嘅音乐，只会系快餐垃圾，岁月流逝后根本沉淀唔出任何嘢。

讲真，细个嘅我并唔中意听怀旧名曲，曾经觉得老一代人嘅歌老土，后来慢慢长大，开始接触旧电影，旧粤语歌，先发现经典金曲嘅美好，开始觉得依家嘅流行歌真系一般，冇咩内涵同韵味。

习惯食粉丝，就会觉得粉丝同鱼翅冇咩区别，一旦食过鱼翅，就会知道粉丝始终系粉丝，同鱼翅有天渊之别。

（此处只系一个比喻，并冇贬低粉丝嘅意思~~~）

另外，个人觉得《流行经典50强》好似一档冇比赛机制嘅《我是歌手》（现已改名为《歌手》），但系唔会有特登营造嘅紧张比赛氛围，亦唔会插播观众听得有几痴迷，背后更加冇咁多黑幕爆料。

《流行经典50强》系一档更加纯粹嘅音乐节目，你为听歌而来，佢会为你准备好一首首经典粤语金曲，等你一一去重温回味。

当然啦，无论系场地设置、歌舞表演定歌手造型，《流行经典50强》都系一贯嘅TVB悭钱画风，肯定比唔上《我是歌手》，所以我更加建议你就带住个耳机听，唔使睇画面。

▲一直唔理解张德兰呢个鸡毛扫造型……

▲舞台设计果然系TVB嘅一贯风格

最后系黄翊现场演唱《最爱的你》视频！

点开之前慎重考虑，

惊你一听就停唔到落嚟！

阿咩建咗个【自己友睇片】群，同你一样追港片港剧嘅自己友喺群度等你。

后台回复【追剧】获得进群入口，或者直接加羊城网 小沅子微信，备注【追剧】，等佢拉你入群喇！

图片素材来源于网络

本文看点由羊城网原创